Arkadag şäherinde ýokary derejedäki halkara maslahat geçirildi

2026-njy ýylyň 12-nji sentýabrynda Arkadag şäheriniň Ruhyýet köşgünde “Garaşsyz, baky Bitarap Türkmenistan – bedew batly at-myradyň mekany”: parahatçylygyň, dostlugyň we hyzmatdaşlygyň giňişligi” atly ýokary derejedäki halkara mejlis geçirildi.

Çärä Türkmenistanyň Hökümet agzalary, harby we hukuk goraýjy edaralaryň, ministrlikleriň, pudaklaýyn düzümleriň ýolbaşçylary, jemgyýetçilik guramalarynyň, syýasy partiýalaryň agzalary gatnaşdylar.

Mejlise gatnaşyjylar ilki Ruhyýet köşgüniň eýwanynda ýaýbaňlandyrylan sergi bilen tanyşdylar. Giň möçberli gözden geçirilişde türkmen halkynyň taryhyna we şu günki ýeten derejesine, Türkmenistanyň ösüşine bagyşlanan gymmatlyklar görkezildi. Amaly-haşam sungatynyň gymmatlyklary sergä gatnaşyjylarda ýatdan çykmajak täsirleri galdyrdy.

Soňra halkara mejlis öz işine başlady. Ahalteke bedewlerine aýratyn gadyr goýýan Prezident Serdar Berdimuhamedowyň “Türkmeniň buýsanjy” atly täze goşgusynyň okalmagy dabara gatnaşyjylarda aýratyn hoşallyk duýgusyny döretdi.

Soňra Türkmenistanyň Gahrymany Annajemal Nurmuhammedowa çykyş etdi. Annajemal Nurmuhammedowa Türkmenistanda halkara gatnaşyklaryň netijeli ösdürilýändigini, türkmen sungatyny we medeniýetini dünýä çykarmak ugrunda zerur tagallalaryň edilýändigini aýtdy. Şunda Gahryman Arkadagymyzyň we Türkmenistanyň Prezidentiniň beýik geljegi nazarlaýan işleriniň uly rowaçlyklara beslenýändigi nygtaldy. Bu bolsa medeniýetleriň özara baglanyşygyny pugtalandyryp, onuň üsti bilen Watanymyzyň waspynyň ýetirilmegini üpjün edýär.

Şeýle hem Türkmenistanyň Döwlet çeperçilik akademiýasynyň uly mugallymy, Türkmenistanyň Gahrymany Saragt Babaýew hem çykyş etdi. Çykyşda bellenilişi ýaly, çeperçilik akademiýasynda talyplara bilim bermek işleri toplumlaýyn esasda alnyp barylýar.

Diňe bir ýurdumyzda däl, eýsem, onuň çäklerinden daşarda-da uly meşhurlyk gazanan ussat heýkeltaraş häzirki döwürde sungat äleminde alnyp barylýan işleriň netijeli häsiýete eýe bolmagyna döwlet derejesinde ähmiýet berilýändigini aýtdy. Bu bolsa beýleki ugurlarda bolşy ýaly, milli heýkeltaraşlyk sungatynda hem täze nesilleriň kemala gelmegini üpjün edýär.

Soňra ÝUNESKO-nyň işleri barada Türkmenistanyň milli toparynyň jogapkär sekretary, Türkmenistanyň Gahrymany Çynar Rustemowa söz berildi. Ol çykyşynda häzirki wagtda türkmen halkynyň Milli Lideri, Türkmenistanyň Halk Maslahatynyň Başlygynyň başyny başlan beýik işleriniň Türkmenistanyň Prezidentiniň baştutanlygynda üstünlikli durmuşa geçirilýändigini aýtdy. Ç.Rustemowa paýhasly pederlerimiziň we zähmetsöýer halkymyzyň döreden milli gymmatlyklarynyň halkara derejede ykrar edilýändigini, munuň şöhraty dünýä dolan Türkmenistanda alnyp barylýan işleriň dünýä nusgalykdygyny alamatlandyrýandygyny nygtady. Bellenilişi ýaly, «Görogly» dessançylyk sungaty, «Küştdepdi» aýdym we tans dessury, dutar ýasamak senetçiligi, dutarda saz çalmak we bagşyçylyk sungaty, türkmen milli halyçylyk sungaty, türkmen keşdeçilik sungaty, ýüpekçilik we dokmaçylykda ýüpek önümçiliginiň däpleri, molla Ependiniň şorta sözlerini gürrüň berijilik däbi, ahalteke atçylyk sungaty we atlary bezemek däpleri ÝUNESKO-nyň Adamzadyň maddy däl medeni mirasynyň sanawyna girizildi.

Beýik Britaniýanyň we Demirgazyk Irlandiýanyň Birleşen Patyşalygynyň Türkmenistandaky Adatdan daşary we Doly ygtyýarly ilçisi Stiwen Konlon öz çykyşynda ahalteke bedewleriniň asyl mekanynda alnyp barylýan işlere, atlar üçin döredilen şertlere ýokary baha berdi. Nygtalyşy ýaly, Ýewropanyň, Aziýanyň, Amerikanyň köp sanly ýurtlarynda ahalteke bedewlerini saklamak, olary ösdürip ýetişdirmek, atlary iri bäsleşiklere gatnaşdyrmak meselelerine möhüm ähmiýet berilýär. Bu bolsa bedewleriň dünýäde mynasyp orun eýeleýändiginiň we olaryň atçylyk sporty boýunça uly ýeňişleri gazanmaga ukyplydygynyň güwäsidir.

Soňra Niderlandlar Patyşalygynyň Kronenberg şäherinde geçirilen ahalteke atlarynyň arasynda gözellik we atly sport bäsleşikleri boýunça dünýä çempionatynyň baş baýragyna mynasyp bolan atyň eýesi, fransiýaly atşynas Odri Martinesiň wideoýazgy arkaly çykyşy diňlenildi. Atşynas Türkmenistanda bu pudagy ösdürmek babatda döredilýän mümkinçilikler üçin Gahryman Arkadagymyza we Türkmenistanyň Prezidentine tüýs ýürekden hoşallygyny beýan etdi.

Fransiýa Respublikasynyň Türkmenistandaky Adatdan daşary we Doly ygtyýarly Ilçisi Alena Grand öz çykyşynda Türkmenistanda Prezident Serdar Berdimuhamedowyň we Gahryman Arkadagymyzyň tagallalary netijesinde döwrebap aýlawlaryň, atçylyk sport toplumlarynyň gurulýandygyny, bu işleriň Türkmenistanda atly sporty ösdürmek ugrunda zerur tagallalaryň edilýändiginiň aýdyň beýanydygyny nygtady.

Ilçiniň çykyşy Gahryman Arkadagymyzyň gatnaşmagynda Niderlandlar Patyşalygynyň Kronenberg şäherinde geçirilen ahalteke atlarynyň arasynda gözellik we atly sport bäsleşikleri boýunça dünýä çempionatynyň baş baýragyna mynasyp bolan fransiýaly atşynasyň baýrak alyp duran pursatlaryndan wideoşekiller bilen utgaşdy.

Mejlisiň dowamynda Ukrainanyň Daşary işler ministrliginiň Merkezi Aziýa boýunça ýörite wekili Wiktor Maýko çykyş etdi. Diplomat türkmen topragynda bildirilen myhmansöýerlik üçin Prezident Serdar Berdimuhamedowa we Gahryman Arkadagymyza tüýs ýürekden hoşallyk bildirdi.

Myhman çykyşynda dünýäde meşhurlyk gazanan ahalteke bedewleriniň taryhyna, şu gününe we milli seýisçilik sungatyna bagyşlanan halkara mejlise gatnaşyp, çykyş etmegiň özi üçin uly hormatdygyny aýtdy.

Halkara mejlis Türkiýe Respublikasynyň Türkmenistandaky Adatdan daşary we Doly ygtyýarly ilçisi Şener Jebejiniň çykyşy bilen dowam etdi.

Ilçi çykyşynda ata Watany Türkmenistanda ösdürilip ýetişdirilýän ahalteke bedewleriniň şan-şöhratynyň dünýä dolmagynyň buýsandyryjy ýagdaýdygyny aýtdy. Ilçiniň nygtaýşy ýaly, häzirki wagtda iki doganlyk ýurduň arasynda ýola goýlan gatnaşyklar ösüşiň täze derejesine çykýar.

Diplomat Türkmenistanda ahalteke bedewlerini ösdürip ýetişdirmekde dünýä nusgalyk ýörelgeleriň bardygyna we bu ugurda oňyn tejribe toplanandygyna ünsi çekdi.

Soňra Azerbaýjan Respublikasynyň Türkmenistandaky Adatdan daşary we Doly ygtyýarly ilçisi Gismat Gozalowyň çykyşy diňlenildi.

Bellenilişi ýaly, soňky ýyllarda Türkmenistan bilen Azerbaýjan Respublikasynyň arasynda gatnaşyklar giň ugurlary öz içine alýar. Şunda medeni-ynsanperwer gatnaşyklaryň, milli atşynaslyk däpleriniň giňden wagyz edilmeginiň ähmiýetine ünsi çekmek zerurdyr.

Türki halklaryň hemmesi üçin ähmiýetli bolan “Kitaby dädem Gorkut”, “Görogly” ýaly eserlerde atyň ýigidiň ýakyn syrdaşydygy beýan edilýär. Munuň özi taryhyň dowamynda ahalteke bedewlerine gyzyklanmalaryň örän ýokary bolandygyny subut edýär.

Soňra Özbegistan Respublikasynyň Türkmenistandaky Adatdan daşary we Doly ygtyýarly ilçisi Rawşanbek Alimowyň çykyşy diňlenildi.

Ilçiniň sözlerine görä, Türkmenistanda medeni mirasy gorap saklamak ugrunda edilýän tagallalar ýokary baha mynasypdyr. Bu işleriň talabalaýyk alnyp barylmagy atlaryň sagdynlygyna, beden gurluşyna oňyn täsirini ýetirýär. Dünýäde deňi-taýy bolmadyk ahalteke bedewleriniň baş sanyny artdyrmak we olaryň arassa ganlylygyny saklamak meselelerine döwlet derejesinde aýratyn ähmiýet berilýär.

Aba Annaýew adyndaky Halkara atçylyk akademiýasynyň mugallymy Lilianna Annaýewa öz çykyşynda bilim ojagynda atçylyk boýunça geçilýän sapaklary has çuňňur özleşdirmegiň meseleleri barada durup geçdi. Ol Gahryman Arkadagymyzyň ýakynda Arkadag şäheriniň Ruhyýet köşgünde ýaşlaryň öňünde geçen umumy okuw sapagynda hem ýaş nesillere atçylyga söýgi döretmegiň ähmiýeti barada gymmatly pikirlerini paýlaşandygyny aýtdy.

Şol pursatda monitorda “Galkynyş” milli at üstündäki oýunlar toparynyň haýran galdyryjy çykyşlaryny görkezýän şekiller peýda boldy.

Soňra “Garaşsyz, baky Bitarap Türkmenistan — bedew batly at-myradyň mekany” ýylynyň taryhy ähmiýetli wakalarynyň üstüni ýetiren halkara mejlisde beýan edilen pikirdir teklipler barada giňişleýin pikir alyşmalar boldy.

Soňra “Arkadag” binasynyň çägindäki meýdançada Niderlandlar Patyşalygynyň Kronenberg şäherindäki “Pilbergen” atçylyk sport toplumynda ahalteke atlarynyň arasynda atly sport we gözellik bäsleşikleriniň dünýä çempionatynyň üstünlikli geçirilmegi mynasybetli dabaraly konsert guraldy.

Prezident Serdar Berdimuhamedowyň maşgala agzalary bilen bilelikde konserte tomaşa etmäge gelmegi ajaýyp künjekde ýaýbaňlandyrylan giň möçberli dabaralaryň derejesini has-da belende göterdi. Munuň özi ýurdumyzda peder-perzent mekdebiniň asylly ýörelgeleriniň häzirki döwrüň ruhuna kybap derejede dowamata atarylýandygyny ýene bir ýola äşgär etdi.

Döwlet Baştutanymyz çäreleriň guramaçylyk derejesine ýokary baha berip, ýurdumyzyň medeniýet we sungat ussatlarynyň halkymyzyň ruhy dünýäsiniň baýlaşmagy ugrunda zerur tagallalary edýändiklerini belledi we olara alyp barýan işlerinde mundan beýläk-de üstünlikleri arzuw etdi.

Bu dabaralar ýurdumyzda şöhratly seýisleriň asylly ýörelgeleriniň ösdürilmegi arkaly bu ugurda alnyp barylýan işleriň netijeli häsiýete eýe bolýandygyny aýdyň görkezdi.

Эти события обеспечивают эффективность деятельности в соответствующих направлениях, способствуют развитию благородных традиций прославленных отечественных коневодов в духе современности. Döwlet derejesinde atçylyk sungatyny kämilleşdirmek, bu ugurdaky milli däp-dessurlary öňdebaryjy tejribeler bilen utgaşykly ösdürmek meselelerine aýratyn ähmiýet berilýär we bu bellenilen çäreleriň guramaçylyk derejesine oňyn täsirini ýetirýär.

Soňra joşgunly konsert feýerwerkleriň ajaýyp öwüşgini bilen utgaşdy. Tyllaýy agşamda Arkadag şäheriniň asman giňişligini bezän bu şekiller çärä gatnaşyjylarda ýakymly duýgulary döretdi.

Prezident Serdar Berdimuhamedow hemmeleri şanly waka bilen tüýs ýürekden gutlap, bu ýerden ugrady.