Türkmenistanyň ilçisiniň Kuweýt Döwletiniň ilçisi bilen duşuşygy

2026-njy ýylyň 4-nji awgustynda Duşenbe şäherinde  ilçi A.Goçmyradow özüniň diplomatik wezipesine girişmegi mynasybetli tanyşlyk sapary bilen gelen Kuweýt Döwletiniň ilçisi Muhammad Raşid Al-Amirinbilen duşuşdy.

Duşuşygyň dowamynda taraplar türkmen-kuweýt gatnaşyklarynyň iki döwletiň Baştutanlarynyň hemişelik ünsi we goldawy netijesinde yzygiderli pugtalandyrylýandygyny bellediler.

Kuweýt Döwletiniň ilçisi Ýakyn Gündogar sebitinde emele gelen ýagdaý bilen baglylykda, Kuweýtiň raýatlarynyň Türkmenistanyň çäginiň üsti bilen howpsuz üstaşyr geçirilmegini guramakda berlen goldaw üçin türkmen tarapyna hoşallyk bildirdi. Şunda Türkmenistanyň ynsanperwerlik, hoşniýetli goňşuçylyk we konstruktiw halkara hyzmatdaşlygy ýörelgelerine üýtgewsiz ygrarlydygy aýratyn nygtaldy.

Şeýle hem, Duşenbe şäherinde Kuweýt Döwletiniň Ilçihanasynyň ýaňy-ýakynda açylmagynyň syýasy-diplomatik, söwda-ykdysady we medeni-ynsanperwer ulgamlarda ikitaraplaýyn hyzmatdaşlygy mundan beýläk-de ösdürmek üçin goşmaça mümkinçilikleri döredýändigi bellenildi.

Söhbetdeşligiň dowamynda sebit we halkara gün tertibiniň möhüm meseleleri boýunça pikir alyşyldy. Taraplar konstruktiw dialogy dowam etdirmäge hem-de ikitaraplaýyn hyzmatdaşlygy mundan beýläk-de pugtalandyrmaga özara gyzyklanma bildirýändiklerini tassykladylar.

Türkmen tarapy söhbetdeşini 2026-njy ýylyň «Garaşsyz, baky Bitarap Türkmenistan – bedew batly at-myradyň mekany» diýen şygary, şeýle hem Türkmenistanyň Garaşsyzlygynyň 35 ýyllygy mynasybetli Türkmenistanda hem-de daşary ýurtlarda geçirilýän çäreler bilen tanyşdyrdy.

Duşuşygyň ahyrynda myhmana türkmen halkynyň Milli Lideri, Türkmenistanyň Halk Maslahatynyň Başlygy Gahryman Arkadagymyzyň «Atda wepa-da bar, sapa-da» atly kitaby gowşuryldy. Kuweýt Döwletiniň ilçisi bu gymmatly sowgada ýokary baha berip, türkmen tarapyna tüýs ýürekden hoşallyk bildirdi.